Mibarog si Bamban Mayor Alice Guo nga inosente siya ug misaad nga ipadayon ang pagdepensa sa iyang integridad ug pagkatawo human siya gisuspenso sa Ombudsman kauban ang 2 pa sulod sa 6 ka bulan tungod sa lig-on nga ebidensya nga nagpakita nga sila sad-an.
Sa usa ka pamahayag, gibutyag ni Guo nga girespeto niini ang legal nga proseso ug gidawat ang desisyon sa Ombudsman.
Giinsister usab sa mayor nga may integridad ang iyang pagserbisyo sa iyang lungsod ug sa katawhan niini.
Nagtuo usab si Mayor Guo nga higayon kini nga iyang maklaro ang mga akusasyon batok kaniya.
Andam usab siya nga makig-alayon sa mga awtoridad aron masiguro ang kamatuoran ug hustisya.
Matud pa usab sa Mayor sa Bamban nga nasubo siya pag-ayo sa mga akusasyon nga gibato kaniya ug nasubo sa pagkondena kaniya sa wala pa madungog ang iyang habig.
Gitataw sa mayor nga kalapasan kini sa iyang katungod isip indibidwal ug isip lider nga gipalingkod sa mga botante sa Bamban isip ilang mayor.
Samtang, ang abogado ni Guo nga si Atty. Nicole Jamilla nagbutyag nga biktima ang mayor ug dili makiangayon nga nalambigit sa mga isyu nga giingong nag-ugat sa regulatory responsibilities sa Pagcor.
Iyang gipasabot nga ang pag-isyu sa business permit ngadto sa POGO firm nga Zun Yuan nisunod lang sa kasamtangang proseso ug protocol, apil na sa Pagcor, ug ang kapakyas ni Guo sa pag-revoke dayon sa business permit subay sa due process nga kinahanglang sundon.
