Ginasusi na sa Malacañang kung asa sa 13,917 ka flood control projects nga gihimo sa miaging administrasyon ang wala epektibong nakapugong sa pagbaha.
Kini ang tubag ni Palace Press Officer USec. Claire Castro kalabot sa pangutana kung nakahimo na ba og assessment ang Malacañang sa mga flood control project nga wala naglihok o wala nakatabang sa pagpugong sa baha, ilabina human sa lapad nga pagbaha sa Metro Manila kagahapon.
Matud ni Castro, gihulat pa nila ang report ug datos gikan sa Department of Public Works and Highways o DPWH aron mahibal-an kung asa nahimutang ang mga proyekto, kung naglihok ba kini, ug kung adunay mga ghost project o mga proyekto nga substandard ang pagkahimo.
Gihisgutan usab ni Castro ang Sunog Apog pumping station isip usa sa mga proyekto nga kaniadto dili husto ang pagkahimo apan naayo ug napagana human sa intervention ug pagpakumpuni.
Dugang pa ni Castro nga gikinahanglan ang pagtinabangay sa gobyerno ug publiko aron masulbad ang problema sa pagbaha.
Padayon usab ang mga proyekto sa DPWH aron matubag ang mga kakulangon sa drainage system, pumping station ug mga agianan sa tubig.
Apan matud ni Castro, mahimong walay kapuslanan ang maong mga proyekto kung padayon gihapon ang paglabay sa basura sa mga estero ug mga agianan sa tubig.
