GENERAL SANTOS CITY – Love Triangle matud pa ang motibo sa pagdunggab sa mag-live in partner sa Prk. San Vicente Baluan ning dakbayan kagahapon kon asa napatay ang lalaki nga nailhan nga si Arcelito Agan, 45, usa ka laborer samtang nakaluwas ang babaye nga si Gemma Manggoy, 30 kon asa nagpaalim karon sa Dr. Jorge P Royeca Hospital human nga naoperahan na.
Sa imbestigasyon sa kapulisan basi sa pahayag ni Manggoy nga daghang higayon na nga nagbahad kanila ang suspek, nga giila niining si Jomar Del Carmen, alias Totong, 32 anyos , usa usab ka laborer, nga iyahang kanhing kapuyo.
Dili matud pa madawat sa suspek nga iya kining gibulagan. Sa pahayag sa nasampit nga nakabalos pa siya ug dunggab sa suspek una siya nakapalayo sa lugar.
Kahibaluan nga alas 4:00 kagahapon sa kaadlawon kalit nga misulod ang suspek sa balay sa mga biktima ug nanunggab gamit ang kutsilyo..
Nakaangkon ug lima ka samad sa dughan ug ulo si Agan samtang nadala usab sa tambalanan ang si Gemma human makaangkon ug samad sa dughan, kilid ug ulo.
Sa pagkakaron padayon ang hot pursuit operation sa mga pulis batok sa suspek aron kini madakpan.
