Nag-viral na karon online ang pag-unfollow ni Louis Tomlinson sa iyang kanhing kauban sa banda nga One Direction nga si Zayn Malik sa Instagram, human sa mga taho sa giingong away.
Nabutyag ang isyu human gikataho nga nag-away ang duha ka mag-aawit samtang nag-film og dokumentaryo.
Sumala sa taho, nagsugod ang tensyon sa dihang giingong nikomento si Zayn bahin sa namatay nga inahan ni Louis, si Johannah Deakin, kinsa namatay niadtong 2016 tungod sa leukemia.
Giingon nga misamot ang sitwasyon, ug nisangpot kini sa pisikal nga sitwasyon, diin giingong gisumbag ni Zayn si Louis. Giingong nakaangkon og samad sa ulo ug concussion si Louis gikan sa singsing nga iyang gisul-ob.
Wala pay opisyal nga pahayag gikan nila ni Tomlinson ug Malik bahin sa nagpadayon nga isyu, ug ang ilang mga ahente nagpabiling hilom bahin sa insidente.
Wala pa’y komento ang streaming platform bahin sa proyekto.
Samtang, angayan nga matikdan nga gisunod gihapon ni Louis ang ubang kanhing miyembro sa One Direction nga sila si Harry Styles ug Niall Horan, ingon man ang namatay nga si Liam Payne.
Bisan pa man og espekulasyon pa lang ang nahitabo, ang mga fans sa duha ka mag-aawit naglaum og klarong katin-awan gikan sa mga artista kabahin sa isyu.
