GENERAL SANTOS CITY – Ugdaw ug nahugno ang usa ka kan-anan, partikular na ang Kurdapoy’s Lechon House sa Atis St. Brgy Dadiangas West ning siyudad, human gilamoy sa dakong sunog nga nagsugod kaganihang kaadlawon.
Ang naasoy’ng duha ka andana nga kan-anan ang gigama sa light materials sama sa kawayan ug kahoy, hinungdan nga paspas nga gilamoy sa kalayo, nga gidunganan pa sa makusog nga hangin.
Gawas sa Bureau of Fire Protection (BFP-GenSan) apil na nga miresponde ang kabomberuhan sa Brgy Labangal.
Kahibaluan nga nanggawas ang mga customer sa hotel nga naa sa atbang sa maong kan-anan bisan ug wala naapil, sa kahadlok tungod sa kadako sa kalayo.
Apil na usab ang mga residente sa mga katapad nga gambalay ug establisyimento, kung asa ang uban ang nanghakot na sa ilang mga gamit pagawas.
Gituuhang sa maong lechon house mismo nanukad ang kalayo, partikular sa ikaduhang andana, gumikan may nadunggan matud pa nga mga pagbuto-buto gikan sa establisyimento, una pa man miulbo ang kalayo.
Samtang, naangin ug ugdaw usab sa sunog ang usa ka bunk house luyo sa lechon house, apil ang usa ka motorsiklo.
Matud ni Fire Senior Inspector Reginald Legaste, gideklarang “fire under control” bandang alas-5:35 sa buntag.
Gipaabot pa karon ang mamahimong resulta sa imbestigasyon ug kantidad sa damyos sa sunog nga gibanabanaang dili muubos sa P200,000.
