GENSAN- Gipadayag ni Atty. Rey Cartojano nga sugod pa lamang ang nahitabong lapad nga lihok protesta kagahapong adlawa nga gipahigayon sa nagkalain-laing lugar sa nasud.
Matod pa niya, kini usa ka sinugdanan sa mas lapad pa nga proseso sa pagbag-o sa sistema sa gobyerno, diin gipadayag sa katawhan ang ilang kalagot ug kasuko batok sa padayon nga kurapsyon.
Daghang sektor ang miapil sa maong kalihokan kung asa adunay mga grupo sa kabatan-onan, mga non-affiliated individuals, ug mga organisadong sektor nga adunay tagsa-tagsang panawagan ug agenda.
Bisan pa man nga nagkalain-lain ang ilang baruganan, nagkahiusa sila sa usa ka tin-aw nga mensahe mao ang pagpaningil ug hustisya batok sa pagpangawat sa kuwarta sa katawhan.
Sumala pa ni Atty. Cartojano, importante nga masabtan nga kini dili lang usa ka kalit nga kalihukan, kondili usa ka hinay-hinay nga pag-alsa sa katawhan nga dugay nang napul-an sa sistemang puno sa anomalya.
