GENSAN – Patay ang usa ka lalaki samtang usa ang naangol human sa nahitabong pagpamusil sa Purok Barrio Blaan, Barangay Labangal ning dakbayan, kagahapon Oktubre 20, alas 6:40 sa gabii.
Ang biktima giila nga si Emilio Campos, 46 anyos, usa ka foreman, ug residente sa Toril, Bato, Davao del Sur.
Samtang ang iyang kauban nga nailhan lamang sa alyas nga “Rolly” nga daling gidala sa SARMED Hospital.
Sumala sa imbestigasyon, ang mga biktima nagpadulong unta aron magpa-refill sa ilang water gallon sa usa ka water refilling station sa maong lugar, sa dihang kalit lang nga may lalaki nga nagsul-ob ug kulay green nga hoody jacket ang miduol kanila ug gipusil sila sa makadaghang higayon.
Human sa insidente, dali nga midagan palayo ang suspetsado padulong sa wala mailhing direksyon.
Samtang paadayun pa usab ang imbestigasyon sa mga kapulisan aron masuta ang motibo ug maila ang suspek sa maong pagpamusil.
