sa ka dakong linog nga may gikusgon nga 7.4 ang miigo sa baybayon sa sidlakang Indonesia niining adlawa, nga nakapatay og usa ka tawo, hinungdan sa mga balud nga moabot og 75 sentimetros (2.5 feet) ug nagresulta og tsunami warning nga giwagtang dayon.
Matud sa US Geological Survey (USGS) nga ang linog miigo sa mabaw nga gilawmon nga 35 kilometros sa Molucca Sea taliwala sa Sulawesi ug Maluku island groups sa sayong kabuntagon.
Usa ka tawo ang namatay sa dihang nahugno ang usa ka building sa siyudad sa Manado sa North Sulawesi province.
Ang Pacific Tsunami Warning Center (PTWC) nga nakabase sa Hawaii sa sinugdanan nag-ingon nga posible ang delikado nga mga tsunami waves sulod sa 1,000 kilometros gikan sa sentro sa linog sa daplin sa mga baybayon sa Indonesia, Pilipinas ug Malaysia.
Sulod sa tunga sa oras human sa linog, ang mga balud nga miabot og 75 sentimetros ang natala sa North Minahasa ug 20 sentimetros sa Bitung, parehong naa sa amihanan sa isla sa Sulawesi, sumala sa Indonesia’s BMKG geological agency.
Traynta sentimetros nga mga balud ang natala usab sa probinsya sa North Maluku.
Gitangtang sa PTWC ang pasidaan niini kapin sa duha ka oras human sa linog, nga nag-ingon nga ang hulga sa tsunami milabay na.
