GENERAL SANTOS CITY – Nagpadayon ang gipahigayon nga contact tracing sa mga nahimamat ni Kapitan Nicanora Vargas sa Barangay Bula human kini matakbuyan sa coronavirus disease.
Matud kang Bula Administrator Dexter Forro, nagpositibo sa covid 19 ang kapitana base sa gipahigayon kaniya nga swab test hinungdan nga pagkakaron naka-isolate na sa ilang panimalay.
Gibutyag sa administrador nga nanguna si Dr. Ruth Camarillo, hepe sa Rural Health Unit (RHU) sa Bula sa contact tracing luyo nga mismo ang kapitana nagkanayon nga wala kini ideya kung asa nakuha ang virus.
Gikanayong sirado ang barangay hall sulod sa usa ka semana hinungdan nga apektado ang pipila ka transaksyon sama sa paghatag og cedula, sertipikasyon, clearance og uban pa.
Hinuon gisiguro ni Forro nga magpadayon ang uban pang serbisyo sama sa pagkolekta sa mga basura og trabaho sa mga barangay tanod.
Naka-isolate na usab karon ang mga empleyado sa barangay hall human nga personal nga nahimamat ang ilang kapitana.
