Dako ang pagmahay ni Parañaque 2nd District Rep. Brian Yamsuan sa kapin P21 bilyon nga mga tambal nga gipalit sa Department of Health (DOH) nga wala magamit sa mga tawo tungod kay giingong expired na kini.
Sa consolidated annual report sa Commission on Audit (COA) nga nakuha ni Yamsuan, mikabat sa P21.234 bilyon nga mga tambal ang naguba gikan sa 2017 hangtod 2024, wala pay labot ang tuig 2025.
Nahibal-an nga sa 2017, ang DOH adunay mga expired nga tambal nga nagkantidad og P192.802 milyon bisan pa sa kamatuoran nga daghang mga Pilipino, labi na ang mga masakiton, ang nanginahanglan niini, samtang sa 2018, P30.353 milyon lang ang gilabay.
Ang gidaghanon sa mga tambal nga na-expire misaka sa 2019 ngadto sa P2.20 bilyon, samtang kini P95.675 milyon sa 2020, P85.213 milyon sa 2021, ug sa 2022 misaka kini ngadto sa P7.430 bilyon.
Angayan nga matikdan nga ang mga tambal nga na-expire sa 2023 mikabat sa P11.186 bilyon, lakip ang kapin sa P7 milyon nga mga bakuna sa Covid-19, samtang sa 2024, ang mga tambal nasayang ngadto sa P34.825 milyon.
Moabot sa P6.73 milyon nga kantidad sa mga tambal nga napalit sa 2017 ang gikatakdang ma-expire, dugang sa P65.444 milyon sa 2023 ug P99.461 sa 20204.
Tungod niini, gusto sa magbabalaod nga hatagan ang DOH og mekanismo sa pagreport ug i-activate ang oversight function sa Kongreso aron mahibal-an kung giunsa paggamit sa ahensya ang mga tambal nga gipalit niini aron masiguro nga dili kini mausik.
Sa 2027, kapin sa P18 bilyon ang gigahin alang sa pagpalit og mga suplay sa nagkalain-laing klase sa tambal, apan gusto ni Yamsuan nga ibalhin kini sa Philippine Health Insurance Corporation ug Medical Assistance to Indigent and Financially-Incapacitated Patients, nga pulos kulang sa pondo.
