Moabot pa sa P180 bilyon ang pondo nga mahimong magamit sa executive department alang sa pagbangon ug rehabilitasyon sa mga lugar nga naapektuhan sa magnitude 7.8 nga linog sa Mindanao, sumala ni Senate President Sherwin Gatchalian.
Ang bag-ong lider sa Senado mao usab ang kanhing chairman sa Finance Committee nga maoy nanguna sa pagsusi sa 2026 National Budget.
Matod ni Gatchalian, iyang itulod ang mas paspas nga pagpagawas sa pondo gikan sa executive department aron sa labing dali nga panahon makabangon ang mga biktima sa linog.
Gikan sa maong P180 bilyon nga pondo, hangtod sa P18 bilyon niini mahimong magamit ubos sa National Disaster Risk Reduction and Management Council (NDRRMC) isip risk reduction fund alang sa reconstruction efforts.
Mahimong gamiton kini alang sa rehabilitasyon ug pagtukod pag-usab sa mga estruktura ug mga bilding nga nadaot tungod sa kusog nga pag-uyog sa yuta.
Giinsistir sa bag-ong Senate President nga adunay igo nga pondo ang gobyerno, ug ang gikinahanglan na lamang mao ang dali ug hapsay nga pagpagawas niini aron masugdan dayon ang rehabilitasyon sa mga naapektuhan.
