GENSAN – Malipayon nga gipahibalo sa Public Safety Office (PSO) sa General Santos City nga kapin na sa 8,500 ka mga tricycle drivers ang nakakuha og pormal nga prangkisa alang sa ilang operasyon sa dakbayan. Apil na niini ang mga nagpa-renew sa ilang existing franchise ug ang mga bag-ong nakadawat og prangkisa.
Matud ni Atty. Jong Gonzales, hepe sa PSO, dako kaayo ang ilang kalipay nga daghan na ang mitubag sa ilang panawagan nga iparehistro ug ipapormal ang ilang operasyon. Giingon niya nga kapin sa 5,000 ka mga bag-ong franchise holders ang narehistro karon, nga nagpasabot og mas lig-on ug mas organisado nga sistema sa tricycle operations sa Gensan.
Dugang pa ni Gonzales, pinaagi sa prangkisa, masiguro nga legal ug luwas ang operasyon sa mga traysikol, ug mapadali ang koordinasyon tali sa gobyerno ug sa sektor sa transportasyon. Usa usab kini ka lakang aron mas mapasig-uli ang kahimtang sa trapiko ug seguridad sa mga pasahero.
Gipasalamatan usab sa PSO ang tanang drayber nga misunod sa proseso ug nagpangayo og franchise, tungod kay kini nagpakita sa ilang kooperasyon alang sa kaayuhan sa dakbayan ug sa katawhan sa General Santos City.
