GENERAL SANTOS CITY – Nagnegatibo sa bird flu virus ang pangsabong nga manok nga naharang sa GenSan Airport niadtong Sabado.
Kahibaluan nga muabot sa 16 ka pangsabong nga manok ang gipailawom sa quarantine sa Bureau of Animal Industry sulod sa 30 ka adlaw human nga gikabalak-an nga nataptan og bird flu virus human nga nasuta nga niagi ang eroplano nga nagdala niini sa NAIA sa kauluhan gikan sa Cagayan una gibiyahe paingon sa GenSan.
Luyo nga nagnegatibo ang maogng mga manok sa bird flu virus, kinahanglan gihapon kining ipailawom sa laing usa pa ka test.
Ugaling magnegatibo sa maong pagsusi, pwede na kining buhian gikan sa veterinary quarantine services aron mabalik sa tag-iya nga si Lucia Rulete na taga Brgy Calumpang Nasayran nga hugot nga gidili sa Bureau of Animal Industry ang pagsulod sa Mindanao og Visayas sa mga poultry by-products, mga buhi nga langgam ug manok nga gikan sa Luzon human gideklara ang bird flu outbreak sa Pampanga.
Samtang, nag-negatibo usab sa bird flu virus ang mga nagsakit og nangamatay nga mga native chicken sa Brgy Fatima ning dakbayan nga una nang gikaalarma sa pipila nga mga nag-alima og manok sa lugar human nga sunod-sunod nga namatay.
Kahibaluan nga sa Blk 4, Lot 2 Fatima, kapin 50 native manok ang naigo sa trangkaso, sip-on, nagluya ug walay gana mukaon dayon namatay paglabay sa pipila ka adlaw.
Matud ni Dr. Ephraim Marin sa City Veterinary Office, dili bird flu virus inay ‘new castle disease’ kon aratay ang miigo sa mga manok sa maong lugar. Luyo sa mga reports, gisiguro sa nsampit nga bird flu free gihapon ang dakbayan.
Apan dili gihapon angayang magkumpiyasa ang ilang buhatan sa posibleng pagsulod sa maong balatian sa poultry animals.
Gidugang ni Dr. MArin nga paglabay ang duha ka semana, ilang balikan ang Fatima aron subling masusi kon hingpit bang nahilway sa sakit ang area.
Samtang, susihon usab ang San Jose kon asa adunay nareport nga mga manok nga sunod-sunod nga nagsakit.
