Gipadayag ni House impeachment prosecutor ug Bicol Saro Party-list Rep. Terry Ridon nga dili moubos sa 50 ka armas ang giingong narehistro sa ngalan ni Bise Presidente Sara Duterte ug sa iyang bana nga si Manases “Mans” Carpio, nga mahimong makadugang sa ilang aktuwal nga net worth kumpara sa nakabutang sa Statement of Assets, Liabilities and Net Worth (SALN) sa Bise Presidente.
Sumala kang Ridon, mangayo ang prosecution panel sa Philippine National Police (PNP) sa mga rekord may kalabutan sa pagpanag-iya sa mga armas ug posibleng ipatawag ang mga firearms dealer ug valuation expert sa impeachment trial aron matino ang kantidad niini.
Gipunting ni Ridon nga ang maong mga armas kinahanglan maapil sa deklarasyon sa SALN tungod kay kabahin kini sa rehistradong personal nga mga kabtangan nga angay ilista sa mga opisyal sa gobyerno.
Matud pa niya, ang maong mga armas gilangkuban matod pa sa mga rifle, revolver, shotgun, ug pistol nga narehistro sa ngalan sa mag-asawang Duterte-Carpio.
Dugang ni Ridon, posible nga moabot sa milyon-milyong piso ang kinatibuk-ang bili sa maong mga armas.
Giklaro usab sa mambabalaod nga dili ang paggamit sa mga armas ang ilang gihisgutan, kondili kung nganong wala kini madeklara sa SALN ni Duterte.
Kabahin ang isyu sa mga armas sa mga ebidensyang gisumite sa prosecution sa impeachment case batok sa Bise Presidente.
Gikatakdang magsugod ang padungog sa Hulyo 6
