Misupak ang kampo ni kanhi Presidente Rodrigo Duterte sa hangyo sa prosekusyon sa International Criminal Court (ICC) nga ma-access ang iyang mga personal nga gamit ug ma-freeze ang kuwarta nga nakuha human siya gidakop ug gidala sa The Hague sa miaging tuig.
Sumala sa depensa, dili na kinahanglan ang pag-freeze sa maong kuwarta tungod kay kini anaa na sa kustodiya sa Registry sa ICC.
Apan kung paboran sa hukmanan ang maong hangyo, ilang gihangyo nga masiguro nga dili moubos ang kantidad sa bisan unsang kwarta nga nakumpiska.
Gihangyo usab sa kampo ni Duterte nga dili tugotan ang prosekusyon sa pag-access sa mga nakumpiskang yawi ug uban pang personal nga gamit, tungod kay posible kini makalapas sa iyang pribasiya ug sa katungod sa pribasiya sa iyang mga sakop sa pamilya.
Sa laing bahin, mipahayag ang Registry sa ICC nga andam silang motuman sa bisan unsang mando nga ipagula sa Trial Chamber III.
