Mag-atubang sa kasong pagpatay ang usa ka mangdugnasay sa lubi kay gitudlong suspek sa mangilngig nga pagtigbas sa iyang higala sa Purok 9,Brgy Looc,Villanueva,Misamis Oriental.
Giila ni Lt Ronnie Donasco, deputy commander sa Villanueva Police Station ang biktima nga si Allan Dayle 48 anyos samtang ang suspek gitumbok nga si alyas Bado nga managsama nga nagpuyo sa maong lugar.
Sumala ni Donasco nga aduany tulo ka persons of interest sa krimen apan usa lang niini ang natumbok ug ngadto-ngadto miangkon nga daw siya ang mihimo sa krimen.
Sa pikas bahin, gisaysay ni Bado nga wala siyay problema ngadto sa biktima apan natripingan lamang niya kini nga patyon gamit ang sanggot nga pangdugnas sa mga unod sa lubi.
Siya miingon nga nakagamit kini’g shabu samtang mikuyog sa panag-inom sa biktima ug uban nila nga mga higala apan wala kaayo modugay ug milaylo sa panagtapok.
Apan gumikan sa giingong epekto sa droga, kalit nga adunay mihasol sa iyang huna-huna ug iyang gisundan ang biktima nga nangihi sa pansayan diin gitigbas niya sa daghang higayon.
Nangayo og pasaylo ngadto sa kabanay sa biktima ang suspek sa iyang gihimo nga krimen.
Dugang niini, gihikay na sa kapolisan ang mga dokumento aron kasuhan sa pagpatay ang suspek sa piskalya ning syudad.
