GENERAL SANTOS CITY – Nagpabilin gihapon sa tambalanan apan padayon sa pagrekober si City Councilor Richard Atendido human nga kini nagpositibo sa Coronavirus disease 2019.
Nakaluwas na ang nasampit sa delikadong sitwasyon luyo nga nagpabilin gihapon nga naka-oxygen.
Gibutyag ni Kagawad Atendido, nakasinati siya og mild nga ubo hinungdan nga naglain dayon siya sa usa ka isolation room sa ilang balay.
Pagkawala sa iyang ubo, nakasinati og duha ka adlaw nga hilanat og pagkawala sa iyang hilanat niubos ang iyang oxygen level kung asa maglisod na og ginhawa hinungdan nga nagpataod og oxygen.
Sa iyang pamahayag nga dies minutos nga walay oxygen ang lawas pwede makasinati og brain dead ang usa ka tawo maong nagdesisyon siya nga magpa-ospital.
Sumala pa nga nagpositibo si Kag. Atendido sa COVID 19 kaniadtong Lunes og giangkon nga wala siya masayod kung asa nga lugar siya natakdan og kinsa ang nakatakod kaniya human sa pipila ka mga panagpulong nga gitambungan og usahay gaadto siya og farm.
Mismo si Kagawad Atendido ang nagpamatuod nga may COVID 19 sa palibot sukwahi sa pagtuo sa pipila nga dili ang maong virus ang binuang lang.
Gihingusgan nga dili basta-basta ang sitwasyon sa usa ka COVID 19 patient tungod dili mabisitahan sa pamilya gawas pa nga dako ang baydunon sa ospital.
Nanghinaut kini nga seryosohon sa publiko ang pakigbatok sa maong infection.
Sa pamahayag ni Kag. Atendido nga natakdan niya ang iyang mga anak og asawa niini kung asa asymptomatic ang mga nasampit.
Maayo na lamang nga kusog ang immune system sa iyang mag-inahan hinungdan nga nakaya lang sa ilang lawas ang maong sakit.
