GENERAL SANTOS CITY- Mularga na karong Marso 25 padulong sa Abu Dhabi si Rajima Dalquez ang inahan ni Jennifer Dalquez aron paminawon ang ulahing pagdungog sa Al Ain court of First Instance sa Abu Dhabi.
Sa exclusive interview ni Rajima sa Bombo Radyo gibutyag niini ang dakong posebilidad nga dili mabitay ang anak tungod naglaum nga dawaton sa duha ka anak sa Emirati employeer ang blood money.
Gibutyag pa niini nga naglusad ug Peso-peso alang sa anak didto sa kauluhan aron adunay matigum alang sa blood money.
Tumong sa iyang pag-adto sa UAE aron paminawon ang hukom sa korte luyo nga miapela alang sa depensa nga insidente ang nahitabo nga pagkapatay sa Amo nga kanhi pulis.
Mihangyo kini ug pag-ampo aron dili mahukman ug kamatayon ang anak, kahinumduman nga niadtong Pebrero 27 wala madayon ang pagpakanaug sa hukom kang Jennifer human gisibug ang pagdungog karong Marso 27.
Sa maong adlaw ipresenta ang duha ka anak sa Emirati ug pangutan-on maka singkwenta ka higayon sa pangalan ni Allah kung si kinsa ang mipatay sa ilang amahan.
Naglaum si Rajima nga makauli sa Pilipinas ang anak tungod nagpaabut ang duha niini ka apo.
