Nakigkita si Israeli President Isaac Herzog kang Bernie Lavarias, bana sa namatay nga Pinay caregiver nga si Mary Ann De Vera sa Jerusalem aron personal nga ipaabot ang iyang pahasubo human sa kamatayon sa Pilipina sa usa ka missile attack.
Sumala ni Herzog, iyang gipaabot ang kinasingkasing nga pahasubo sa estado sa Israel ngadto sa pamilya ni De Vera ug sa tibuok katawhang Pilipino.
Gipaambit usab niini nga saludo ang Israel sa mga Pilipino caregivers nga kanunay giisip nga kabahin sa ilang pamilya.
Gipasalig usab sa Presidente nga si Lavarias makadawat dayon og pinansyal nga tabang ug binulan nga mga benepisyo ubos sa programa sa kompensasyon sa Israel alang sa mga biktima sa gubat.
Gipasalamatan ni Philippine Ambassador Aileen Mendiola ang Israel sa suporta nga gipakita sa pamilya sa namatay nga Pilipina ug gipahayag ang kasubo sa komunidad sa mga Pilipino sa kamatayon ni De Vera ug lima pa ka mga Pilipino nga namatay taliwala sa gubat tali sa Israel ug Iran sa miaging tuig ug sa mga pag-atake niadtong Oktubre 7.
Samtang, ang mga patayng lawas sa Pilipina gipalupad gikan sa Israel kagabie ug gilauman nga moabot sa nasud karong adlawa.
