GENERAL SANTOS CITY – Nahimong mainitun ang inter agency site inspection sa gituohang treasure hunting sa Prk. 11, Lanton, Brgy. Apopong ning syudad, kauban ang mga tanod ug opisyales sa Brgy. Apopong, BJMP, Makar Police Station, DENR ug CENRO Gensan og nakita ang dugay nang kadudahan nga lalom nga kalot sa yuta sa mga residente.
Gipanag-iyahan ang 1.6 ektarya nga compound ni Pastor Neri Mabulo Clam, nga maoy labaw sa usa ka private NGO nga Bantay Bayan.
Matud pa ni Jail Senior Inspector Nemerias De Quia ang Deputy Jail Warden sa City Reformatory Center or Lanton City Jail nga dili sayun makasulod sa compound tungod ang mga adunay ID ug susi lang ang may katungod.
Dugang niini aduna usab gasulod gawas nga mga laborers sa miaging mga bulan sa compound.
Pagtuo sa mga nagpuyo duol sa lugar, may mga gakalot sa yuta tungod sa treasure hunting activities.
Pag-abot sa mga operatiba, naabtan ang gikaingong treasure hunting site kung asa nakatabon ug plywood apan sa pag-abli, anaa sa 130 feet ang kalawmon sa gikalot nga yuta.
Dugang sa opisyal, dugay na nilang ginareklamo ang maong pagkalot-kalot sa lugar tungod duol lang kini sa City Reformatory Center or Lanton City Jail kung asa gibanabanaang 50 meters lang ang gilay-on.
Sa bahin usab ni Pastor Clam, alang sa pagpangita ug tubig ang katuyuan sa maong pagkalot.
