Nanghinaot ang Senate Impeachment Court nga masulbad dayon sa Supreme Court o SC ang mga petisyon nga nagkuwestiyon sa desisyon niini nga usbon ang basehan sa ihap sa mga boto alang sa pag-convict o pag-acquit kang Vice President Sara Duterte.
Sumala kang impeachment court spokesperson Atty. Reginald Tongol, gipaabot nila nga si presiding officer senator-judge Francis “Chiz” Escudero ug ang tibuok impeachment court nga makapagawas ang SC og desisyon sa dili pa mobotar ang mga senator-judge alang sa pinal nga hukom sa impeachment case.
Importante usab, matud pa niya, nga masulbad una ang maong isyu sa dili pa ang final voting aron malikayan ang sitwasyon nga nakapagawas na og desisyon ang impeachment court apan pending pa sa SC ang isyu kabahin sa balidad sa voting threshold.
Matud pa, niadtong Setyembre 23, pinaagi sa 13-0 nga ruling, gipadayon sa impeachment court ang two-thirds requirement nga ibase sa mga senador nga legal ug aktuwal nga mahimong makaapil sa pagtaral.
Tungod niini, nausab ang kanhi 16-vote threshold, depende sa ihap sa mga senator-judge nga kwalipikadong makaapil sa panahon sa final judgment.
Samtang, duha na ka managlahing petisyon ang gisang-at sa Supreme Court batok sa maong ruling.
Si kanhi Executive Secretary Victor Rodriguez ang unang misang-at og Petition for Certiorari and Prohibition niadtong Setyembre 24 ug nangayo usab og temporary restraining order batok sa pagpatuman sa bag-ong voting rule.
Samtang si Atty. Ernesto Francisco Jr. misang-at usab og laing petisyon niadtong Setyembre 25, diin iyang gihangyo nga ideklarang unconstitutional ang ruling sa impeachment court ug magpagawas ang SC og Status Quo Ante Order aron mapahunong ang pagpatuman niini.
Sa pagkakaron, gipahayag sa impeachment court nga magpadayon ang pagtaral samtang walay mando gikan sa Kataas-taasang Hukmanan nga nagmando sa paghunong niini.
