SULTAN KUDARAT– Nagapadayon ang imbestigason sa mga kapulisan sa natigayon nga pagpamusil patay sa assistant election officer sa Commission on Election Isulan sa President Quirino, Sultan Kudarat.
Giila ang biktima nga si John Nico Allan Dionaldo Pandoy, may asawa, Assistant Comelec Officer sa Isulan, Sultan Kudarat og residente sa Purok Sampaguita, Brgy. Poblacion, President Quirino, Sultan Kudarat.
May natumbok na nga mga tawo nga posible may kalambigitan sa krimen apan ginasusi pa sa pagkakaron ang ilhanan sa mga nasampit.
Migawas sa imbestigasyon sa President Quirino PNP nga riding-in-tandem ang may responsable sa pagpusil patay kang Pandoy.
Pasado alas-4 sa hapon dihang pauli na unta sa ilang balay ang biktima sakay sa iyang motorsiklo, dihang gisundan sa duha ka lalaki nga sakay usab sa motorsiklo.
Pag-abot sa bahin sa National Highway, Purok Sampaguita, Poblacion, President Quirino, Sultan Kudarat gitiro makapila ka higayon nga hinungdan sa iyang hinanaling kamatayon. Gilayon pa kini nga gidala sa hospital apan wala na masalbar pa.
Matud ni PMajor Rissa Hernaez, tigpamaba sa Police Regional Office 12 nga sa karon, gipalawman sa kapulisan ang imbestigasyon aron masayran ang motibo sa krimen ilabina kung may kalabotan ang pagpusil sa biktima sa trabaho niini.
