Gitugutan sa Trial Chamber III sa International Criminal Court o ICC ang hangyo sa Office of the Prosecutor nga opisyal nga iapil sa rekord ang natalang testimonya sa testigong gitago sa ngalan nga “P-1100” ubos sa Rule 68(3).
Sa desisyon nga gipagawas niadtong Oktubre 2, gipamubo sa Korte ngadto sa usa ka oras, gikan sa orihinal nga gihangyo nga duha ka oras, ang panahon alang sa dugang nga pagpangutana sa Prosecution.
Tumong niini nga mapadayon nga paspas, hapsay ug episyente ang dagan sa hearing.
Giaprobahan usab sa Korte ang pag-apil sa lima ka mga report nga mismo ang testigo ang misulat ug nagsumiter isip bahin sa iyang pahayag.
Apan, gisalikway sa Trial Chamber III ang upat pa ka dokumento nga gisumiter sa Prosecution tungod kay wala kini igo nga mapasabot o magamit sa testigo atol sa iyang testimonya.
Kauban niini, gipahinumdoman sa Korte ang panig sa Prosecution nga mag-amping ug likayan ang gitawag nga “wholesale dumping,” o ang balik-balik ug dinaghan nga pagpasulod sa mga ebidensya sa trial record nga wala kaayo’y direktang kalambigitan sa kaso.
