GENERAL SANTOS CITY – Karong adlawa na tagbuon sa taga City Sports Division sa Gensan Airport ang bag-ong IBO Featherweight Champion nga si Dave Apolinario. Kini human gibutyag ni Sannie Sombrio, City Sports Division Officer nga nakig-alayon sila sa San Man Promotions alang sa ipahigayon nga Hero’s Welcome. Gikan matud pa sa Gensan airport paingon sa syudad isakay si Apolinario sa sakyanan nga musubay sa pipila ka dalan ug mulahos sa City Hall aron pakigkitaan si Gensan Mayor Lorelie Pacquiao.
Kuyog ni Apolinaro nga muabut sa syudad ang iyang Manager nga si Jessie Manangquil. Kahinumduman nga gipakuratan ni Apolinario ang tibuok kalibutan dihang giknock-out sa unang round ang African Boxer nga si Gideon Buthelezie sa ilang away kaniadtong Hulyo 30 sa International Convention Center sa East London, South Africa.
Gikalipay sa taga dakbayan ang pagsakmit ug titulo sa nahisgutang Boxer nga taga Gensan atul sa iyang away. May record na kini nga 17 ka daug walay pildi nga may 12 knockouts.
