Gipasalig sa mga lider sa House Quad Comm nga dili tugotan sa Komite nga mamalikas si kanhi Presidente Rodrigo Duterte kon motambong siya sa hearing.
Kini ang gipahibalo sa mga lider sa House Quad Comm, nga sila si Santa Rosa Laguna Rep. Dan Fernandez ug Manila Rep. Bienvenido Abante.
Ang pamahayag sa duha ka lider nunot sa sitwasyon sa Senate hearing diin daghang higayon nga nangalupad ang pamalikas sa kanhi Presidente.
Matud pa ni Abante nga kung mahitabo atol sa quad comm hearing kay ipatuman dayon sa Komite ang Point of Order.
Gihatagan og gibug-aton ni Abante nga dili kini maka-angayon ilabi na nga adunay mga batan-on nga nagtan-aw ug naminaw sa pagdungog.
Kahinumduman nga uyon si Senate President Francis “Chiz” Escudero sa pagsaway ni Senador Risa Hontiveros kang Rodrigo Duterte human kini nagpauwan og pamalikas sa gipahigayon nga imbestigasyon sa Senado kalabot sa war on drugs.
Gihatagan og gibug-aton sa opisyal nga sakto lang ang gibuhat ni Hontiveros gumikan dili usab kini gusto nga mahimong ‘manhid’ ang Senado.
