Gitan-aw gihapon sa House prosecution panel nga malampuson ang lima ka adlaw nga pretrial proceedings sa impeachment case ni Vice President Sara Duterte bisan pa wala nila maablihi ang box gikan sa Bureau of Internal Revenue (BIR) nga gituohang adunay sulod nga tax records sa bise presidente ug sa iyang bana nga si Atty. Manases “Mans” Carpio.
Matod ni lead prosecutor Rep. Gerville Luistro, nakab-ot sa prosekusyon ang ilang tumong nga mapadali ang pretrial conference ug maandam ang kaso alang sa pagsugod sa impeachment trial sa Hulyo 6. Giingon usab niya nga wala na nila tagda ang ubang isyu nga gipanglabay sa depensa aron dili kini makapahinay sa proseso.
Samtang, giila ni Rep. Joel Chua nga usa sa pinakadakong hagit sa pretrial ang dili pagsinabtanay sa duha ka panig bahin sa common markings sa mga dokumento nga gamiton isip ebidensya, diin kapin 4,000 ka dokumento may kalabotan sa confidential funds ang gimarkahan sa prosekusyon ug nadoble pa kini tungod sa lahi nga pagmarka sa depensa.
Matod ni Chua, nadugangan ang trabaho tungod niini, apan giingon sa kampo sa depensa nga mas gipili nila ang kaugalingong pagmarka human adunay insidente diin adunay kulang nga usa ka pahina sa usa ka dokumento sa prosekusyon.
Gipatin-aw usab ni Luistro nga tungod sa kadaghan sa mga dokumento gikan sa Office of the Vice President ug Department of Education, posible nga adunay ing-ani nga insidente.
Sa pagkakaron, naghulat na ang duha ka panig sa pagpagawas sa pretrial order sa impeachment court ug sa pormal nga pagsugod sa impeachment trial sa Hulyo 6.
