Gitugyan na sa House Prosecution panel sa Senate Impeachment Court ang desisyon o discretion kung mahimong dungan nga mo-uswag ang impeachment case ug criminal case batok kang Vice President Sara Duterte.
Sa pakighinabi sa Bombo Radyo kang House Legal Spokesperson Benjamin Tolosa Jr., gipangutana ang abogado bahin sa reaksyon sa House panel sa pahayag sa kampo ni VP Sara nga mahimong “dangerous precedent” alang sa mga impeachable official kung dungan nga ipadayon ang impeachment complaint ug criminal case batok sa bise presidente. Matud ni Tolosa, mahimong maapektuhan usab niini ang ubang impeachable officials sama sa presidente, Ombudsman ug mga mahistrado sa Supreme Court.
Sumala niya, gipasagdan na sa House panel sa local court ug impeachment court ang desisyon kung uyon ba sila sa posisyon sa kampo ni VP Sara nga dili na ipadayon ang criminal case tungod kay nag-uswag na ang impeachment complaint.
Ang criminal case batok kang VP Sara nag-ugat sa iyang giingong pagpanghulga kang Presidente Ferdinand Marcos Jr., First Lady Liza Araneta-Marcos ug presidential cousin nga si Rep. Martin Romualdez niadtong Nobyembre 2024. Ang maong isyu usa usab sa mga basehan sa impeachment complaint batok sa bise presidente.
Bisan pa niini, giingon ni Tolosa nga lahi ang liability ug quantum of evidence nga gikinahanglan sa duha ka bulag nga proceedings kung dungan kining mo-uswag.
Una nang misaad ang kampo ni Duterte nga maghimo og manifestation aron ipugos ang panginahanglan sa oral arguments sa motion to quash sa bise presidente, tungod kay lapad ug bug-at ang mahimong epekto sa mga kaso dili lamang sa akusado kondili usab sa ubang impeachable officials sa nasud.
Samtang, naglaum ang House panel nga dili ipatuman ang “complete gag order” bisan pa sa unang pagsaway sa defense team ug impeachment court sa post ni Atty. Virgil Ligutan bahin sa isyu sa misleading questions. Matud ni Tolosa, kung busalan ang duha ka kampo, mas mosamot ang pagkaylap sa fake information, ilabina online diin walay nagbantay ug dili na usab ma-review sa korte.
