Gitay-ug Magnitude 5.7 nga linog ang Hinatuan, Surigao del Sur kaganinang 1:53 sa kaadlawon kung diin kini nabati sa nagkalain-laing bahin sa probinsya lakip na ang Surigao del Norte, pipila ka bahin sa Davao ug ingon man sa Butuan City.
Sumala sa earthquake bulletin sa Philippine Institute of Volcanology and Seismology o PhiVolcs, ang linog adunay giladmon nga 10 kilometros ug ang epicenter niini nahimutang 135 kilometros amihanan sa Hinatuan, Surigao del Sur.
Ang pagtay-og nabati sa Intensity III sa Bislig City, diin daghang mga residente ang nakamata tungod sa pag-uyog sa ilang mga balay ug gamay nga pagtay-og sa palibot nga lugar.
Sa pagkakaron, walay mga report sa dakong kadaot sa mga kabtangan o mga nasamdan nga residente, apan ang mga awtoridad nagpadayon sa pagmonitor.
Gitambagan usab ang publiko nga magpabiling kalmado, maminaw sa mga pasidaan gikan sa mga awtoridad, ug mangandam alang sa posibleng dugang nga mga pagtay-og.
Natala usab ang mga aftershock sa lungsod sa Cagwait, nga adunay magnitude nga 3.9, ug 2.3 sa lungsod sa Hinatuan.
