Hilabihan kadako ang mga isyu sa kurapsyon sa gobyerno, ilabi na ang anomalosong flood control projects nga naglambigit sa pipila ka opisyal sa Senado ug Kongreso kung asa gikabalak-an sa katawhan.
Gibutyag ni Atty. Arthuro Cloma nga kasamtangang makita nga ang gobyerno mismo ang gikontra sa katawhan tungod sa kawalay klarong paggamit sa pondo.
Gilauman usab nga mahimong tinud-anay ang imbestigasyon kabahin sa maong proyekto, ilabi na nga ang uban sa mga giingong nalambigit niini, anaa usab sa mga ahensiyang naga-imbestigar.
Kini, sumala pa niya, usa ka delikadong conflict of interest nga makapaluya sa tinuod nga hustisya.
Kauban sa panawagan sa pag-angkon og accountability, pipila ka estudyante ang mikuyog sa usa ka silent protest batok sa kurapsyon kagahapon dinhi sa dakbayan.
Sa ilang pamahayag, giingon nila nga ang katawhan, ilabi na ang kabatan-onan, adunay katungod nga mopadayag sa ilang tingog batok sa kalapasan sa gobyerno.
Ang maong mga panawagan dungan sa Trillion Peso March nga usa ka dagkong protesta nga ipahigayon ogma sa Kaulohan nga tumong nga ipakita ang pagsupak sa sistematikong kurapsyon ug panginahanglan sa bag-ong porma sa gobyerno nga limpyo ug matinud-anon.
