GENERAL SANTOS CITY – Nagpabiling naa sa kustodiya sa Explosive Ordnance Disposal kon EOD ang granada nga nakaplagan sa Block 7, Area 2, Labos, Fatima ning dakbayan.
Giangkon ni Nely Pascual, nakuratan og gibati og tumang kahadlok human nga nakaplagan sa iyang mga laborers nga silang Alias Soysoy og Alias Dyomong kilid sa pader ang usa ka granada.
Nagmasa og semento alang sa gipa-renovate niining balay ang iyang mga trabahante dihang naapil pagkapala sa balas ang granada.
Gani, giputos kini og kulay pink nga short sa bata og mabaw ang pagkalubong.
Gilayon nilang gireport sa mga otoridad ang nakaplagang granada kon asa gitumbok sa EOD Team nga usa ka PRB 423 controlled fragmentation handgrenade.
Sa gihimong pagsusi, nakakabit pa ang safety pin ring nga kon natangtang, mubusikad pa kini og magsresulta og dakong damyos og daghang kinabuhi pa sa tao ang naangin.
Luyo nga wala maaktohan kon kinsa ang naglubong sa granada, duda si Pascual nga ang silingan nga iyang nakabangi ang responsable niini.
Hinuon, nagpasalamat si Pascual nga wala nibusikad ang granada samtang gitugyan ngadto sa mga otoridad ang ipahigayong imbestigasyon.
