GENERAL SANTOS CITY – Gilayon nga nakigkita si Sarangani Governor Steve Chiongban Solon kang Maasim Mayor Zyrex Pacquiao aron personal nga masuta ang gipatumang lakang og mga plano nga gipahigayon human nga sa miaging adlaw nakabsan sa kinabuhi ang usa pasyente sa COVID 19.
Matud pa ni Sarangani Gov Steve Chiongbian Solon, dili ordinaryo nga katabang sa panimalay ang trabaho sa nahisgutang babaye.
Nasuta nga sinaligan di-ay sa iyang amo sa paghikay sa ilang negosyo ug daghang mga negoyante pa ang nahimamat niini sa Gensan fishport.
Sa pamahayag sa nasampit, gipailawom sa lockdown ang usa ka sityo Colon kung asa dili makagawas ang tawo sa maong lugar gawas nga usa lang ka tawo sa matag balay ang tugutan nga makagawas alang sa pagpalit sa ilang mga panginahanglanon.
Anaa sa critical zone ang usa ka compound sa Brgy. Colon gumikan sa gihimong contact tracing sa mga nahimamat sa namatay nga babaye.
Gibutyag ni Gov. Solon, target nga magpabiling zero ang covid cases sa Maitum, Kiamba, Glan og Alabel samtang naningkamot nga mapgungan ang local transmission og ibalik sa zero status sa covid sa Maasim.
