Nakurat ang katawhan sa usa ka gituohang improvised explosive device (IED) nga nakapahimo og alarma sa mga pasahero ug empleyado sa Bulaong Terminal sa General Santos City ning buntag sa Agosto 3, 2026, nasuta nga dili diay tinuod nga bomba.
Gireport sa terminal management ngadto sa kapulisan ang kadudahang butang nga nakit-an sa lugar pasado alas 8:30 sa buntag. Tungod sa kabalaka sa posibleng peligro, gipatawag dayon ang Explosive Ordnance Disposal (EOD) team aron susihon ang maong butang.
Matod ni Marianne Anas, Officer-in-Charge sa Bulaong Terminal, nasuta sa EOD nga ang butang gilangkuban lamang sa guba nga battery ug flashlight nga gihigot sa wire ug gibiyaan sa wala mailhing indibidwal.
Gipaniguro sa mga otoridad nga walay nahitabong kadaot o samad sa maong insidente. Padayon usab ang pag-imbestiga aron mahibal-an kung kinsa ang responsable sa pagbilin sa maong kahina-hinalang butang.
Gipahinumdoman sa kapulisan ang publiko nga ireport dayon ang bisan unsang kahina-hinalang butang aron malikayan ang posibleng peligro ug mapadayon ang seguridad sa mga pampublikong lugar.
