Gidawat ni Gilas Pilipinas head coach Tim Cone ang ilang makapakurat nga kapildihan sa Chinese Taipei sa kataposang bintana sa FIBA Asia Cup Qualifiers.
Matud pa niini nga seguradong giandam gyud nila og maayo ang maong duwa.
Kini maoy labing unang kapildihan sa Gilas Pilipinas batok sa Chinese Taipei sukad niadtong 2013.
Iyang gitataw nga daghang kasaypanan ang nahimo sa Gilas ug walay angay basulon sa ilang kapildihan kondili ang coach.
Kahinumduman nga gipildi sa Chinese Taipei ang Gilas Pilipinas, 91-84 sa ilang sangka karong Huwebes sa gabii.
Pipila sa mga yawe sa kadaugan sa Chinese Taipei mao ang ilang duha ka naturalized players nga sila si Mohammad Al Bachir Gadiaga ug Brandon Gilbeck.
Ang Gilas adunay upat ka daog ug usa ka pilde sa Group B diin ilang ikasangka ang New Zealand karong Domingo ug ang modaog maoy makoronahan nga mga mananaog sa grupo.
