Wala matod pa nagdali ang aktor nga si Gerald Anderson nga makigrelasyon pag-usab, samtang mas nakapokus siya karon sa iyang mga negosyo ug uban pang prayoridad.
Lakip sa iyang bag-ong venture ang Trivera powered by Solora, usa ka glamping resort sa Zambales.
Matud ni Anderson, wala niya gipugos ang pagpangita og gugma ug gisalig nga moabot kini sa hustong panahon.
Sa pagkakaron, mas gusto usab ni Anderson nga mag-camping nga siya ra, apan nagtuo siya nga mahimo usab kini nga maayong ideya alang sa usa ka date aron mas mailhan ang usa ka tawo, ilabina kung unsa kini makasagubang sa lisod ug dili komportableng kahimtang.
Gipaambit usab sa aktor nga dako og epekto kaniya ang iyang online reality series nga “Pusong Bayani” nga nakatutok sa West Philippine Sea.
Matud niya, dugay na siyang interesado sa mga dokumentaryo bahin sa West Philippine Sea ug naglaum nga mas daghang tawo ang makatan-aw niini aron mas masabtan ang mga nahitabo sa maong lugar.
Samtang, magtrabaho usab si Anderson sa usa ka action-comedy project kauban si Jerald Napoles.
