GENERAL SANTOS CITY – Hangtud karon walay nadawat nga impormasyon si GenSan Mayor Ronel Rivera kalabot sa 8.7-billion pesos right of way scam dinhi sa dakbayan nga una ng gibulgar ni Justice Sec. Vitaliano Aguirre.
Sa pakighinabi sa Bombo Radyo, giangkon sa mayor nga nangutana ngadto kang kanhi Sarangani Governor Migs Dominguez kung aduna ba kiniy ideya sa gikaingong scam apan wala usab matud pay kasayuran ang opisyal kabahin niini.
Suportado sa Mayor ang unsa mang himuong imbestigasyon sa Department of Justice aron masayran kung kinsa ang mga nagpaluyo sa scam.
Angayan matud pang iduso gayud ang pg-imbestiga may kalabutan niini ilabina nga gikan kini sa panudlanan sa gobyerno.
Kahibaluan nga basi sa ‘expose’ sa DOJ Secretary, ang scam ang gikalambigitan sa mga tag-as nga opisyal ni kanhi Pangulong Noynoy Aquino.
Ang mga gitumbok ni Aguirre mao silang kanhi Public Works Sec. Rogelio Singson og kanhi Budget Sec. Florencio Abad.
Gani, gibutyag ni Aguirre nga si Singson ang nag-apruba og nag-request sa release sa bayad alang sa pekeng RROW o Road Right of Way. Samtang si Abad usab matud pa ang nag apruba sa pagpagawas sa pondo alang sa illegal Road Right of Way.
Welcome alang kang Kagawad Ramon Milleza nga maimbestigahan ang naasoy’ng ‘expose’ sa DOJ.
Matud pa ni Milleza, pinaagi sa imbestigasyon masayran kon adunay natigayon nga kahiwian ilabina sa mga road projects sa syudad ingon man ang mga nagpaluyo.
Gikadugang pa sa konsehal, angayang manubag ang nalambigit sa scam kung mapamatud-ang guilty human sa imbestigasyon.
Sa pamahayag ni Kag. Milleza nga dili ikalimod nga may epekto sa GenSan ang pagbuto sa maong scam kung asa ang mga negosyante ang mabalaka og magduhaha basin ang ilang mapalit nga yuta ang may kwestyon.
Sumala pa nga ilang hisgutan una ang isyu una ang pormal nga pagsumiti og resolosyon nga gasuporta sa imbestigasyon.
Samtang, mibalibad una si Kag. Rosalita Nuñez nga hukman kung adunay kamatuoran ang maong scam.
Matud pa niini mas maayong sutaon ang mga kamatuoran basi sa himuong imbestigasyon.
Hinuon gibutyag nga kung tinuod ang maong scam, klarado nga kini usa ka sindikato.
May kalabutan niini, gitahasan na ni Aguirre ang NBI nga ipadayun ang ilang case build-up aron mapakusog ang kaso batok sa mga nalambigit sa scam.
