GENSAN– Isip pagsaulog sa tibuok nasud sa Women’s Month, nagpadayag og makapadasig nga mensahe si Mayor Lorelie Pacquiao ngadto sa tanang kababayen-an sa dakbayan.
Atol sa iyang pakighinabi kaniya sa Bombo Radyo, gihatagan og gibug-aton sa mayor ang kusog ug kalig-on sa mga babaye taliwala sa mga hagit sa kinabuhi.
Matod pa niya, dili angay nga mawad-an og paglaom ang mga kababayen-an sa bisan unsang pagsulay nga moabot kanila.
Gipahinumdoman ni Mayor Pacquiao ang tanan nga dili gayod mosurender sa mga hagit sa kinabuhi.
Sa pamahayag sa nasampit nga dili kita hatagan sa Ginoo og mga problema nga dili nato makaya o dili nato malampasan.
Ang panawagan sa mayor nagpakita sa iyang suporta sa ’empowerment’ sa mga kababayen-an sa GenSan.
Nasayran nga ng maong selebrasyon kabahin sa padayon nga programa sa Lokal nga Kagamhanan sa General Santos City aron mapataas ang dignidad ug papel sa kababayen-an sa katilingban.
