GENSAN – Gikatakda nga i-privatize ang General Santos International Airport kauban ang siyam pa ka mga regional airports sa tibuok nasud.
Kini ubos sa plano sa Department of Transportation nga i-modernisa ang dagkong paliparan pinaagi sa Public-Private Partnership o PPP scheme.
Tinguha sa maong inisyatibo nga mapaayo ang operasyon, serbisyo, ug pasilidad sa mga airport pinaagi sa partisipasyon sa mga pribadong kompanya nga adunay kapasidad sa pagpanglakat sa modernong airport operations.
Lakip sa mga airport nga target i-privatize mao ang Iloilo, Bacolod, Davao, Laguindingan, Bohol-Panglao, Kalibo, Puerto Princesa, Siargao ug Busuanga, gawas sa General Santos.
Gipangandaman na karon ang proseso sa pagpili sa mga private partners nga motabang sa pagpadagan ug pagmintinar sa maong mga paliparan.
Sa General Santos, positibo ang panan-aw sa lokal nga liderato sa plano, ilabi na sa aspeto sa pagdani og dugang nga mga turista ug negosyo sa rehiyon.
Nagpadayon ang koordinasyon tali sa DOTr ug sa mga lokal nga panggamhanan aron masiguro nga ang transisyon paingon sa privatization hapsay ug makabenepisyo ang katawhan.
