Nanawagan si Senator Sherwin Gatchalian sa Social Security System (SSS) na magpatuman og loan moratorium aron matabangan ang middle class nga naapektohan sa pagsaka sa presyo sa lana gumikan sa krisis sa Middle East.
Sumala kang Gatchalian, pwede kining mahimong sama sa lakang sa Government Service Insurance System (GSIS), nga nagpatuman na og temporaryong pagsuspende sa pagbayad sa utang.
Dungan niini, gibutyag usab sa senador ang inisyatiba sa Pag-IBIG Fund nga naghatag og tulo ka bulan nga housing loan moratorium alang sa mga miuli nga overseas Filipino workers o OFWs nga apektado sa gyera.
Kalabot niini, girekomenda ni Gatchalian nga palugwayan pa ang sama nga tabang aron masakop ang tanang miyembro sa Pag-IBIG, dili lamang ang mga OFW.
Base sa datos sa Senate Economic Planning Office, miabot sa 4.1% ang inflation kaniadtong Marso, nga nagresulta sa pag-ubos sa ‘purchasing power’ sa mga katawhan.
Gibanabanaan nga nawad-an og P1,138 hangtod P2,275 kada buwan ang anaa sa 9.1 milyon nga ‘lower middle-income households’, samtang anaa sa P2,274 hangtod P3,982 usab ang nabawas sa kita sa kapin-kulang 3.4 million nga middle middle-income households.
Gihingusgan usab sa senador ang pagtuon sa Philippine Institute for Development Studies, nga nagkanayong huyang ang ’emerging middle class’ sa mga temporaryong krisis sama sa pagsaka sa presyo, pagkawala sa trabaho, og mga emergency sa panglawas.
Sa ulahi, gihingusgan ni Gatchalian ang hinanaling aksyon aron mapagaan ang pinansyal nga pas-anon sa mga Pilipino taliwala sa padayong pagtaas sa gastos sa panginabuhi.
