Padayon na ang pagpasang-at ug reklamo sa Bureau of Internal Revenue (BIR), ilabina ang tax evasion case nga mokabat sa P2.228 bilyon batok sa Hongsheng Gaming Technology, Inc. sa Department of Justice (DOJ).
Sumala sa kawanihan, ang maong kompanya nga nag-operate og offshore gaming activities sa nasod giatubang sa mga reklamo sa underdeclaration sa kita, sayop nga deklarasyon sa value-added tax (VAT), ug kapakyasan sa pag-withhold ug pag-remit sa final withholding tax alang sa mga langyaw nga trabahante niini gikan sa taxable years 2021 hangtod 2023.
Base sa imbestigasyon ug mga rekord gikan sa nagkalain-laing ahensya sa gobyerno, adunay dakong kalainan tali sa gidiklarang kita sa Hongsheng ug sa mga opisyal nga rekord, hinungdan nga miabot sa P2,227,759,311.21 ang deficiency tax liability sa kompanya.
Gipasiugda ni BIR Commissioner Charlito Martin R. Mendoza nga padayon nilang panalipdan ang mga matinud-anong nagbabayad og buhis batok sa tinuyo nga tax evasion, samtang iyang gipasiugda nga walay negosyo nga angay makaganansya sa Pilipinas samtang naglikay sa obligasyon nga gitakda sa balaod.
Ang pagsaka sa kaso kabahin gihapon sa Run After Tax Evaders (RATE) Program sa BIR aron mapakusgan ang pagpatuman sa balaod batok sa mga kalihokan nga makapakunhod sa kita sa gobyerno.
