Miabot na sa US$7.1 bilyon ang kinatibuk-ang net foreign direct investments (FDI) sa Pilipinas gikan sa Enero hangtod Nobyembre 2025.
Kini gibase sa datos nga gipagawas sa Bangko Sentral ng Pilipinas (BSP), nga nagpakita sa lig-on nga pagsalig sa mga langyaw nga negosyante sa ekonomiya sa nasud.
Diin sa bulan sa Nobyembre 2025 lamang, ang nasud nakatala og net inflows nga nagkantidad og US$897 milyon.
Ang report nagbutyag nga ang South Korea mao ang pangunang tinubdan sa pondo sa maong bulan, diin ang dakong bahin sa ilang puhunan gibubo sa manufacturing industry.
Sa tibuok nga panahon sa unang onse ka bulan sa tuig, gawas sa South Korea, ang kadaghanan sa equity capital placements gikan sa Japan, Estados Unidos, ug Singapore.
Ang mga inflows gigahin alang sa pagtubo sa paggama, wholesale ug retail trade, ug real estate.
Sumala sa mga eksperto, ang padayon nga pagpalig-on sa FDI hinungdanon sa pagpadali sa produksiyon ug pag-abli sa dugang mga oportunidad sa trabaho sa nasud.
