Nagpahibalo ang Commission on Elections (Comelec) nga malampuson ang final testing and sealing (FTS) sa automated counting machines (ACM) nga gamiton sa Mayo 12 nga piniliay.
Matod niya ang tanang ACMs naapod-apod na sa tibuok nasod ug ang FTS magpadayon hangtod Mayo 7.
Sa matag presinto, ang electoral board nagpahigayon og pagsulay aron masiguro nga ang mga makina nag-ihap sa husto, modawat sa opisyal nga mga balota, ug nga ang ilang mga resulta mohaum sa manwal nga pag-ihap.
Nagsugod ang FTS niadtong Mayo 2 sa mga piniling presinto.
Ang proseso naglakip sa machine testing ug aktuwal nga pagboto sa 10 ka pinili nga mga botante. Ang mga resulta sa makina ikumpara sa manual count pagkahuman sa pagboto.
Nunot niini, selyohan ug ibutang ang mga makina sa buhatan sa Department of Education Supervisor Official (DESO), nga bantayan sa Philippine National Police (PNP) ug Armed Forces of the Philippines (AFP) hangtod mismo sa adlaw sa piniliay.
