Gipanalipdan ni Senate Impeachment Court Presiding Officer Chiz Escudero ang pagpagawas sa subpoena alang sa Statements of Assets, Liabilities, and Net Worth o SALN ni Vice President Sara Duterte gikan 2007 hangtod 2025.
Sa ika-25 nga adlaw sa impeachment trial kagahapon, Martes, Setyembre 15, gipatin-aw ni Escudero nga gikinahanglan ang mga daang rekord aron adunay ‘baseline’ sa pagtino sa mga kausaban sa gideklarar nga bahandi sa Bise Presidente.
Gibase ni Escudero ang iyang desisyon sa mando sa Korte Suprema sa kaso nga Office of the Ombudsman v. Bernardo niadtong Marso 2013.
Dugang pa niya nga importante ang pag-establisar og ‘baseline figure’ dili lamang alang sa prosecution kundili usab sa defense aron adunay klarong basihanan sa pagkuwenta sa SALN sa tibuok termino ni Duterte isip Bise Presidente.
Gipaklaro usab sa presiding officer nga ang pagtugot sa subpoena wala magpasabot nga gipadako ang mga sumbong batok kang Duterte aron ilakip ang mga giingong nahimo niya sa wala pa siya nahimong Bise Presidente.
Giingon niya nga gamiton lamang ang mga naunang dokumento isip reperensiya ug dili aron makadugang og bag-ong mga sumbong batok kaniya.
Gipagawas ang maong klaripikasyon samtang nagpadayon ang paghisgot sa Senate impeachment court sa Article II sa kaso.
Nakasentro ang maong probisyon sa mga alegasyon bahin sa dili maipasabot nga bahandi, sayop nga deklarasyon sa SALN, ug ang giingong padayon nga pakig-partner sa mga negosyo samtang nagserbisyo sa gobyerno.
