Giangkon na sa aktor nga si Elijah Canlas nga nagbulag na sila sa iyang hinugugma ug kaubang artista nga si Miles Ocampo human sa ilang lima ka tuig nga relasyon.
Gipasabot ni Elijah nga gituyo niya nga itago ang ilang pagbulag aron irespeto si Miles, apan kinahanglan na niya kining tuldokan gumikan sa mga hungihong nga nanggawas, diin giklaro sa aktor nga nagbulag sila sa maayong paagi.
Bisan gipili ni Elijah nga dili na idetalye ang hinungdan sa ilang pagbulag, gipadayag niya nga gisulayan pa nila nga ayuhon ang relasyon sa ikaduha nga higayon sa wala pa sila nakadesisyon nga magpalayo sa usag-usa.
Sumala pa kaniya, sakit ang ilang gidangatan tungod kay walay dakong problema, apan nakat-onan lang nila nga dili gyud sila haom sa usag-usa.
Gipadayag usab ni Elijah nga bisan pa man sa nahitabo, pabilin niyang higugmaon ug respetuhon si Miles sa tibuok niyang kinabuhi.
