GENERAL SANTOS CITY – Head-on collision ang natigayon nga pagbangga sa topdown og motorsiklo sa Brgy. Tinagacan ning dakbayan maging gabii.
Matud pa ni Police Staff Sergeant Limue Aves, imbestigador sa GenSan-Traffic Management Unit, nag-abot tunga sa highway sa nasampit nga dapit ang motor ug topdown nga pulos kusog ang padagan.
Sa imbestigasyon, tulo ang sakay sa motorsiklo samtang usa ang sakay sa topdown.
Dead on arrival sa ospital ang driver sa motor nga si Regar Numanap, 24 anyos nga taga Brgy. Apopong ning syudad samtang samdan ang mga angkas niini nga silang Ronel Taglay ug Dino Villamor.
Ang driver sa topdown nga si Jessie Torres ang nakaangkon usab ug mga samad sa kalawasan nga sumala pa ni Aves posibleng mag-atubang sa reckless imprudence resulting to multiple homicide and damage to property.
Kustodiya sa TMU ang motor ug topdown samtang ginapaabot ang pagpasang-at ug kaso sa mga biktima.
Samtang, patay usab ang nagpangalan ug Joseph Barcelon human nga ma-hit and run sa highway Brgy Labangal ning siyudad.
Sa impormasyong gipadangat sa Bombo Radyo sa GenSan-TMU, namatikdan sa mga lumalabay sa lugar ang nagbuy-od nga lawas sa lalaki hinungdan nga giduolan.
Sa pagsusi sa mga nasampit, wala nay kinabuhi ang maong biktima hinungdan nga gireport sa mga pulis.
Human nga nakadawat ug tawag gilayon nilang girespondihan ang lugar og sa ilang pag-imbestiga, gikanayon kanila sa mga nakasaksi sa hitabo nga na-hit and run matud pa ang biktima ug gibiyaan lang kini sa nakabangga.
Alayon niini, subling nanawagan ang otoridad nga mag-amping sa tanang higayon kung magmaneho aron malikay sa disgrasya sa kalsada.
