GENERAL SANTOS CITY – Namatay sa cardiac arrest ang usa ka opisyal sa 1002nd Infantry Brigade Philippine Army human nakit-an nga wala nay kinabuhi sulod sa iyang quarter sa Pulutana, Malandag Malungon kagahapon sa buntag.
Kini matud pa ang migawas nga resulta sa gipahigayon nga post mortem sa Scene of Crime Operatives nga misusi sa patay nga lawas ni 1Lt Allan Magkalas Du.
Basi sa impormasyon nga nakita na lamang nga wala na makagawas sa iyang quarter ang opisyal hinungdan nga girespondihan sa kapulisan sa Malungon sa pagpanguna ni Lt. Col. Edgar Yago.
Una nga gibutyag ni Lt. Col. Teody Condesa, spokesperson sa Sarangani Provincial Police Office nga walay nakita nga foul play sa pagkamatay sa opisyal.
Human masusi ang patay nga lawas sa nahisgutang sundalo gilayon kining gidala sa punerarya samtang giandam ang patay nga lawas aron dad-on pauli sa ilang lugar sa Angeles, Pampanga.
