GENERAL SANTOS CITY – Mukabat sa P16.8M ang natunol sa DSWD 12 sa unang adlaw sa pagpanghatag sa cash assistance sa mga indigent student.
Matud ni DSWD 12 Dir. Restituto Macuto nga sa maong kantidad anaa sa 7,240 indigent students ang nahatagan ug tabang.
Gikabutyag pa niini nga magpulong sila kauban ang taga DSWD central office aron resolbahon ang kaguliyang nga natigayon sa unang semana sa pagpanghatag ug cash assistance.
Gikadugang pa ni Director Macuto nga nagmando na ang Department of the Interior and Local Government sa mga LGU nga tabangan sa maong ginbuhaton.
Kini human giulanan ug daghang pagsaway ang DSWD gumikan sa wala masunod nga health protocol hinungdan nga nagpunsisok ang katawhan ug kakulang sa kahan-ay sa pagtunol sa hinabang sa gobyerno.
Hinuon giangkon sa taga DSWD nga wala nila mapangandaman pagmaayo nga ingon adto ka daghan sa mga tawo nga midagsa sa ilang mga satellite offices ug sa mga lugar nga gipahigayon ang pay outs.
