Nihangyo ang Department of Science and Technology nga hatagan ug pagtagad ang ilang tinguha nga matuman ang Virology and Vaccine Institute of the Philippines.
Tumong sa maong departamento nga makabaton sa maong institusyon nga motutok sa pagtan-aw sa mga matang sa sakit dili lang sa tawo kon dili lakip na sa mga mananap ug tanom.
Sa usa ka interbyu, ang kasamtangang Kalihim sa Department of Science and Technology (DOST), Secretary Renato Solidum, nipaambit nga kung madayon, ang establisemento niini makatabang sa pagpangandam sa nasud sa sunod nga pandemya kung mahitabo kini pag-usab.
Gilauman usab nga kini makadugang sa gidaghanon sa ilang mga eksperto nga kawani ug mga espesyalista sa siyentipikong pagtuon.
Samtang, gipasigarbo sa Department of Science and Technology nga nagpadayon sila sa pagtabang sa mga Filipino scientists nga makabalik sa nasud.
Matod ni Secretary Renato Solidum, adunay mga 120 ka Filipino scientists nga gisuportahan sa ilang repatriation program sa Pilipinas.
