Giwagtang sa Department of Labor and Employment (DOLE) ang kahadlok sa mga trabahante nga giingong wala nay paglaom nga mosaka ang ilang suholan.
Kini human sa kapakyas sa Kongreso sa pag-aprobar sa sugyot balaod nga usbaw sa suholan.
Matud ni DOLE Undersecretary Benjo Benavidez nga ang regional wage boards padayong nagtuon sa mga petisyon alang sa usbaw sa suholan.
Dugang pa niya nga sa National Capital Region, padayon ang pagtuon sa nasangpit nga mga petisyon.
Gani, matud niya nga adunay usbaw sa suholan nga ipatuman sa umaabot nga mga buwan sa ubang rehiyon.
Kahinumduman nga human napasar sa ikatulo ug kataposang pagbasa sa House of Representatives ang P200 nga usbaw sa inadlaw nga suholan sa mga minimum wage earners, wala na kini maaprobahan sa Senado.
