Nagpabiling hilom ang Department of Justice (DOJ) bahin sa mga komento ni Senator Judge Erwin Tulfo kalabot sa mga reklamo nga natanggong batok kang Vice President Sara Duterte.
Sa pahayag sa ahensya nga gipadala ni Justice Spokesperson Atty. Polo Martinez, iyang giingon nga likayan una sa DOJ ang paghatag og tubag bahin niini.
Matod pa niya, dili mokomento ang kagawaran sa mga nasangpit nga isyu, ilabina sa nagpadayon nga impeachment proceedings sa Senado batok sa Bise Presidente.
Gihimo kini sa DOJ isip pagrespeto ug paghatag og pagpasidungog sa impeachment court nga nagpadayon sa pagdungog sa kaso batok sa ikaduhang pangulo sa nasud.
Bisan pa niini, gipasalig sa DOJ nga wala nila pasagdi ang mga pangutana nga gikwestyon ngadto sa ilang opisina.
Gibutyag ni Atty. Polo Martinez nga ang mga reklamo nga natanggong batok sa Bise Presidente padayon gihapon nga giimbestigahan sa kagawaran.
Nag-atubang si Vice President Sara Duterte og mga reklamo nga inciting to sedition ug grave threats nga gisang-at sa National Bureau of Investigation niadtong Pebrero 2025.
Ang pahayag sa DOJ migawas human gikwestyon ni Senator Erwin Tulfo bahin sa wala pa masulbad nga mga kaso batok sa Bise Presidente.
Samtang, sa usa ka interbyu, giingon ni Department of Justice Secretary Frederick Vida nga nagpabilin gihapon sa parehas nga kahimtang ang maong mga kaso.
Bisan og milapas na og usa ka tuig ang pag-file niini, wala pa gihapon makagawas og resolusyon gikan sa prosekusyon sa kagawaran.
Gipasaka ang reklamong sedisyon ug grave threats batok kang Vice President Sara Duterte human sa iyang gipahayag kaniadto nga adunay giingong hulga sa kinabuhi ni Presidente Ferdinand “Bongbong” Marcos Jr., First Lady Liza Araneta-Marcos, ug kanhi House Speaker Martin Romualdez.
