Nagpahinumdom ang Department of Health sa publiko nga mag-amping panahon sa Amihan, labi na sa mga sakit nga kasagarang masinati niining panahona.
Ang Amihan nagdala og bugnaw ug uga nga hangin nga kasagarang masinati gikan sa Nobyembre hangtod Marso, busa importante nga mangandam ug mapanalipdan.
Ang pipila sa mga sakit nga kanunay nga mahimong problema panahon sa Amihan mao ang trangkaso, nailhan usab nga influenza; ang sip-on, nga kanunay inubanan sa pag-ubo ug pagbahing; pneumonia, usa ka impeksyon sa baga nga mahimong hinungdan sa kalisud sa pagginhawa; allergic rhinitis, nga hinungdan sa iritasyon sa ilong ug pagbahing tungod sa mga allergens; ug uga nga panit, nga mahimo usab nga moresulta sa eczema, usa ka kondisyon diin ang panit mahimong katol ug manghubag.
Aron malikayan ang pagkaylap niini nga mga sakit, ang DOH nagpagawas ug pipila ka importanteng pahinumdom ug rekomendasyon.
Kini naglakip sa kanunay nga paghugas sa mga kamot gamit ang sabon ug tubig, labi na sa dili pa mokaon ug pagkahuman mogamit sa banyo.
Kung nakasinati ka og mga sintomas sa sakit, gitambagan nga magpabilin sa balay aron malikayan ang pagtakod sa uban. Importante usab nga magsul-ob og face mask kung mogawas sa balay, labi na sa mga lugar nga daghang tawo, aron mapanalipdan ang imong kaugalingon ug ang uban.
